జింఖానా క్లబ్‌కు కేంద్రం షాక్: ఖాళీ చేయాలంటూ షోకాజ్ నోటీసు

దేశ రాజధానిలోని అత్యంత కీలకమైన ల్యూటెన్స్ జోన్‌లో ఉన్న ఢిల్లీ జింఖానా క్లబ్‌ను ఖాళీ చేయించే దిశగా కేంద్ర ప్రభుత్వం తన చర్యలను వేగవంతం చేసింది. సఫ్దర్‌జంగ్ రోడ్డులోని 27.3 ఎకరాల విస్తీర్ణంలో ఉన్న ఈ ప్రాంగణాన్ని స్వాధీనం చేసుకునేందుకు 'పబ్లిక్ ప్రెమిసెస్ (ఎవిక్షన్) యాక్ట్, 1971' కింద క్లబ్‌ యాజమాన్యానికి షోకాజ్ నోటీసులు జారీ అయ్యాయి.

ఈ వ్యవహారంలో ఎస్టేట్ అధికారి తాజాగా స్పందిస్తూ, క్లబ్‌ను ఎందుకు ఖాళీ చేయించకూడదో వివరణ ఇవ్వాలని ఆదేశించారు. ఇందు కోసం జూలై 7వ తేదీ మధ్యాహ్నం 2:30 గంటలకు విచారణకు హాజరుకావాలని నోటీసులో పేర్కొన్నారు. క్లబ్ ప్రతినిధులు తమ వాదనలకు మద్దతుగా తగిన ఆధారాలను సమర్పించాలని, లేనిపక్షంలో ఏకపక్షంగా నిర్ణయం తీసుకోవాల్సి ఉంటుందని హెచ్చరించారు.

లీజు ఒప్పందాన్ని రద్దు చేసిన తర్వాత కూడా క్లబ్ ఈ ప్రాంగణంలో కొనసాగడం పూర్తిగా చట్టవిరుద్ధమని, అనధికారికమని కేంద్ర ప్రభుత్వం వాదిస్తోంది. ప్రధానమంత్రి నివాసంతో సహా అనేక వ్యూహాత్మక ప్రాంతాలకు సమీపంలో ఉన్న ఈ భూమిని రక్షణ రంగ మౌలిక సదుపాయాలు, ప్రజా భద్రత, పరిపాలనా అవసరాలు మరియు ఇతర ప్రజా ప్రయోజన ప్రాజెక్టుల కోసం వినియోగించాల్సిన అవసరం ఉందని ప్రభుత్వం స్పష్టం చేస్తోంది.

1928 నాటి లీజు ఒప్పందం ప్రకారం ఈ క్లబ్ ఇక్కడ కార్యకలాపాలు సాగిస్తోంది. అయితే, ఒప్పందంలోని క్లాజ్ 4 ప్రకారం, ప్రజా ప్రయోజనాల దృష్ట్యా భూమిని తిరిగి స్వాధీనం చేసుకునే పూర్తి హక్కు ప్రభుత్వానికి ఉంటుంది. ఈ నిబంధనను పురస్కరించుకునే కేంద్రం ప్రస్తుతం కఠిన చర్యలు చేపట్టింది. కాగా, క్లబ్ నిర్వహణలో అవకతవకలు జరిగాయని, సుమారు రూ. 47 నుంచి 48 కోట్ల వరకు అద్దె బకాయిలు ఉన్నాయన్న ఆరోపణలు ఉన్నాయి. ఈ క్రమంలోనే గత మే నెలలో ప్రభుత్వం జారీ చేసిన ఆదేశాలను క్లబ్ యాజమాన్యం ఢిల్లీ హైకోర్టులో సవాలు చేయగా, ప్రస్తుతం ఆ కేసు విచారణలో ఉంది.